ملګري ملتونه وايي په غزه کې تراوسه هېڅ ډول مرستې نه دې وېشل شوې

ملګري ملتونه وايي له تېرو ۱۱ اوونيو بنديز وروسته که څه هم د مرستو لارۍ د غزې له پولو اوښتې دي خو لا تراوسه په غزه کې هېڅ ډول مرستې نه دي وېشل شوې.

اسرائیلي چارواکو ويلي، د تېرې سې شنبې په ورځ ۹۳ لارۍ چې اوړه، د ماشومانو خواړه، طبي تجهيزات او درمل په کې بار وو غزې ته ننوتلې دي.

خو ملګري ملتونه وايي، سره له دې چې دغه د کرم شالوم له لارې فلسطینۍ غاړې ته رسېدلي خو تراوسه هېڅ ډول مرستې نه دې وېشل شوې.

د ملګرو ملتونو وياند سټېفن ډوجارېک ويلي، د مرستو يو جوپه “څو ساعته” انتظار وه چې اسرائيل سیمې ته د لاسرسي اجازه ورکړي “خو له بدمرغه هغوی ونتوانېدل دغه توکي زموږ ګودام ته ورسوي.”