د لوګر ولایت د لوړو زدهکړو موسسې مسوولین وایي چې نن د دغه ولایت د ښوونځیو له ۲۵۰۰ فارغینو د کانکور ازموینې اخیستو لړۍ پيل شوه.
د لوګر د لوړو زدهکړو موسسې ريیس مفتي ضیااحمد صارم په دې اړه جوړې شوې غونډې ته وویل چې سږ کال له دغه ولایته د کانکور ازموینه کې شاوخوا ۲۵۰۰ کسان ګډون کوي.
هغه زیاته کړه چې دغه ازموینه له یاد شمېر کسانو په درېیو ورځو کې اخیستل کېږي.
بلخوا، د لوګر مرستیال والي مولوي محمدانور دینپرور وویل، اوس د دې وخت رارسېدلی چې زموږ ځوانان د عصري زده کړو برخه کې پرمختګ وکړي او هېواد ته بریالیتوبونه راوړي.
هغه زیاته کړه، هر افغان دا دنده او مسوولیت لري چې بل افغان ته د لیک لوست زمینه برابره کړي.
د هغه په خبره، د ښوونځيو او پوهنتونونو ښوونکو ته په کار ده چې زدهکوونکي او محصلین په داسې روحیه وروزي چې هېواد ته په صداقت سره خدمت وکړي.
د ازموینې ملي ادارې له لوري د لوګر په ګډون د هېواد په یو شمېر نورو ولایتونو کې هم د روان ۱۴۰۴ کال د کانکور ازموینې اخیستو لړۍ پیل کړې ده چې ټاکل شوې په راتلونکو درېیو ورځو کې به بشپړه شي.
دا په داسې حال کې ده چې د ملي ازموينو اداره وايي چې د ۱۴۰۴ کال کانکور ازموينه به په پنځو پړاوونو کې له د غبرګولي له اومې نېټې بیا د سرطان تر شلمې پورې ترسره شي او سږ کال به له ۱۱۲ زره ډېر نوماندان د لوړو، نيمه لوړو زدهکړو او ماسټري پروګرامونو ته جذب شي.
د دې ادارې د معلوماتو له مخې، د کانکور ازموينې لومړۍ مرحله به په ميدانوردګو، پروان، پنجشېر، پکتیکا، غور، دايکنډي، لوګر، کاپيسا، غزني، بغلان او باميان ولایتونو کې ترسره شي.
