لوګر ولایت عامې روغتیا ریاست مسؤولین وایي چې د دغه ولایت بېلابېلو ادارو په همکارۍ په تېر یوه کال کې شاوخوا ۳۰۰ په نشې روږدي کسان درملنه شوې دي.
د دغه ولایت د عامې روغتیا ریاست مطبوعاتي مسؤل فهیم الله لودین مهال راډيو ته وویل، دغه کسان د امنیه قوماندانۍ په همکارۍ له مرکز پل علم او ولسوالیو څخه راټول شوې او ددغه ولایت د معتادینو ۳۰ بستریز روغتون کې تر درملنې وروسته خپلو کورنو ته ستانه شوې دي.
لودین زیاتوي، د لوګر ولایت روغتیايي کارکوونکو په بیلابیلو سیمو کې شاوخوا ۴ زره کسانو ته د نشې توکو د کارونې زیانونو په اړه عامه پوهاوی هم ورکړی ده او هڅه کوي چې د پوهاوي کچه لرو پرتو ولسوالیو ته هم وغځول شي.
بلخوا د لوګر ولایت مرکز پل علم یوه اوسیدونکي الهام مهال راډیو ته وویل، د ا.ا له لوري په نشې د روږدو کسانو د راټولولو او درملنې برخه کې د پام وړ مثبت کارونه شوې دي.
هغه ټینګار کوي چې حکومت باید په دغه ولایت کې هغه کسان ونیسي چې د نشه یي توکو راکړه ورکړه ترسره کوي او له نشې روږدي کسانو ته دې د کارکولو او حریفوي زده کړو زمینه برابره کړي.
لوګر عامې روغتیا ریاست په داسې حال کې د درې سوه په نشې د روږدو کسانو د درملنې خبر ورکوي چې همدا تېره اونۍ د لوګر ولایت امنیه قوماندانۍ ۸ ټنه نشه يي توکي چې په تړاو یې ۱۷۷ کسان نیولي شوي وو له مینځه یوړل.
