د لوګر پوهنې ریاست مسوولان وایي چې دغه ودانۍ د محمداغې ولسوالي د «صالح محمد» د هلکانو او نجونو منځني ښوونځي ته د چاپان په مالي لګښت جوړه او نن «یکشنبه، غبرګولي ۱۱مه» ګټېاخېستنې ته سپارل شوې ده.
د دغه ولایت پوهنې ریاست ویاند شاه پور عرب مهال راډيو ته وویل، دغه ودانۍ چې د جاپان له لوري د شاوخوا اته میلیونه افغانیو په مالي لګښت پر یو جریب ځمکه جوړه شوې، شپږ درسي ټولګي، یوه اداري خونه، یوه تحویلخانه، د اوبو څاه، د لمریزې برښنا او اوبو منظم سیستمونه، د لاس مینځلو ځایونه، کانکریټي کثافت دانۍ او ۶ غرفې تشنابونه لري.
نوموړي زیاته کړه، صالح محمد د هلکانو او نجونو دغه ښوونځی ۱۵ کاله مخکې د پوهنې وزارت لهخوا د لوګر د پوهنې ریاست په چوکاټ کې فعال شوی و.
د نوموړي په وینا، نوې جوړه شوې ودانۍ یې په یوه وخت کې د ۳۵۰ زدهکوونکو د ځایولو وړتیا لري او په جوړېدو سره یې د شته ۷۰۰ زدهکوونکو د سرپناه ستونزه هواره حل شوه او هم ورته د زدهکړو لازم ښوونیز چاپېریال برابر شو.
د محمداغې ولسوالي اوسېدونکي هم خوښ دي چې د جاپان له لوري د صالح محمد د هلکانو او نجونو ښوونځي ته معیاري ودانۍ جوړه شوه.
خو دوی ټینګار کوي چې د یادې ولسوالي په لروپرتو سیمو کې اوس هم ډېری ښوونځي ودانۍ نهلري او زدهکوونکي یې له پراخو ستونزو سره سره په ازاده فضا کې په لیک لوست بوخت دي.
