د لوګر د بدني روزنې او ورزش امریت وایي چې د دغه ولایت په کوربهتوب د پکتیا، پکتیکا، خوست او غزني ولایتونو د ۱۶۰ غوره لوبغاړو ترمنځ یو ورځنۍ رزمي سیالۍ ترسره شوې.
د لوګر د بدني روزنې او ورزش امر انجنیر مزمل نعیمزي مهال راډیو ته وویل چې دغه سیالۍ د لوګر ولایت په کوربهتوب د المپیک ملي کمېټې له لوري جوړې شوې وې.
هغه دغه راز زیاته کړه چې یادې سیالۍ د سوېلختیځ زون په کچه د ورزشکارانو ترمنځ د همغږۍ، د هغوی د ظرفیت لوړولو او د غوره لوبغاړو پېژندلو په موخه ترسره شوې.
د نعیمزي په خبره، د المپیک ملي کمېټه هڅه کوي چې د سوېلختیځ زون په نورو ولایتونو کې هم دغه ډول سیالۍ جوړې کړي.
بلخوا، د یادو سیالیو یوه ګډونوال لطفالله وویل، دا ډول سیالۍ کولای شي د ولایتونو او زونونو په کچه د ورزشکارانو ترمنځ اړیکې پیاوړې او ظرفیت لوړ کړي.
هغه زیاته کړه، اړتیا ده چې د المپيک ملي کمېټه د سوېلختیځ زون ورزشکارانو ستونزو ته رسېدنه وکړي.
د یادونې ده، د یادو سیالیو په پای کې غوره لوبغاړو ته ډالۍ او ستاينلیکنونه هم ورکړل شول.
