د لوګر امنیه قومنداني مسوولان وایي چې د روانۍ اوونۍ د دوشنبې پر ورځ د محمداغې ولسوالي په «دهنو» کلي کې له ایران څخه تازه راستون شوی حفیظ الله چې د نامعلومو کسانو له لوري په ډزو وژل شوی و، قاتل یې نیول شوی دی.
د دغه ولایت امنیه قومنداني ویاند مولوي احمدالله انس مهال ته وویل، امنیتي ځواکونو د پرلهپسي هڅو په ترڅ کې د یادې پېښې قاتل نیولی دی.
انس زیاته کړه، په یاد کس تور دی چې له دې وړاندې د وژل شوي کس یو بل ورور یې هم په ډزو وژلی و.
د امنیه قومنداني د ویاند په خبره پېښه د شخصي دښمنۍ له امله رامنځته شوې او امنیتي ځواکونه هڅه کوي چې په پېښه کې د نورو شریکو کسانو په اړه هم پلټنه وکړي.
