د ریاست الوزرا اقتصادي مرستیال ملا عبدالغني برادر اخند نن جمعه د روان کال د سنبلې په ٢١مه د کونړ له زلزله ځپلو او د زلزله ځپلو سیمو د لیدنې په موخه یاد ولایت ته سفر وکړ.
په دې سفر کې د ریاست الوزرا اقتصادي مرستیال سره د ننګرهار او کونړ والیانو، د افغاني سرې میاشتې مشر شهاب الدین دلاور او د پیښو پر وړاندې د مبارزې رییس ملا نورالدین ترابي او يو شمېر نورو مسوولانو ملتیا کوي.
د ریاست الوزراء اقتصادي مرستیال له زلزله ځپلو سره د لیدنې پرمهال په دې ستر ناورین خپله خواشیني وښوده، په زلزله کې د شهیدانو روح ته یې دعا او ټپیانو ته یې د عاجلې روغتیا هیله وکړه.
عبدلغني برادر اخند د اسلامي امارت په استازیتوب په دې ستر غم کې ځان شریک وباله او ویې ویل، په تیرو څلورو کلونو کې دا درېیم ځل دی چې د سختو زلزلو له امله هیوادوالو ته درانه مالي او ځاني زیانونه اوړي.
هغه زیاته کړه، د امکاناتو د محدودیت باوجود اسلامي امارت پر دې توانیدلی چې پر وخت د زیانمنو لاسنیوی وکړي.
عبدالغني برادر اخند د کونړ زلزله ځپلو ته ډاډ ورکړ چې اسلامي امارت د دوی ترڅنګ ولاړ دی.
د هغه په وینا، ټولو امارتي مسوولانو ته یې لارښوونه کړې چې مرستې را ټولې او په شفاف ډول یې پر مستحقو زیانمنو وویشي.
د ریاست الوزرا اقتصادي مرستیال په سوداګرو، پانګوالو او خیریه بنسټونو غږ وکړ چې د کونړ له زلزله ځپلو سره خپلې مرستې جاري وساتي.
همداډول هغه د زلزلې له امله د زیانمنو سیمو د بیارغونې له پاره ترلاس لاندې اړینو پلانونو ته په اشارې سره وویل، هڅه کوي چې په زلزله کې د ورانو شویو کورونو د بیرته رغولو لپاره امکانات برابر او په راتلونکي کې د طبیعي پیښو د زیان کچې را کمېدو لپاره هر اړ خیز تدابیر ونیسي.
اقتصادي مرستیال له ټولو هغو هیوادونو، هیوادوالو، ملي سوداګرو او خیریه بنسټونو دمننې ترڅنګ چې د کونړ له زلزله ځپلو سره یې مرستې کړې، پر نړیواله ټولنه غږ وکړ چې په دې سختو شرایطو کې دې پر افغانستان لګیدلي بندیزونه پایته ورسوي، څو زیانمنو افغانانو ته د مرستو رسولو او اقتصادي ستونزو ته د رسیدنې بهیر پر وړاندې شته خنډونه له منځه ولاړ شي.
