لوګر ولایت امنیه قوماندانۍ مسؤولین وایي چې ددغه ولایت په څرخ ولسوالۍ کې د یوه کشفي راپور له مخې دوه کسان له ۲۷ کېلو ګرامه نشه يي توکو سره یو ځای نیول شوي دي.
د دغه ولایت امنیه قوماندانۍ ویاند مولوي احمدالله انس مهال راډيو ته وویل، نیول شوي کسان د لوګر ولایت د څرخ او خروار ولسوالۍ اوسیدونکي دي چې له ۲۷ کېلو ګرامه نشه يي توکو د قاچاق او پلور پر مهال نیول شوې دي.
انس زیاته کړه، د لوګر ولایت امنیه قوماندانۍ پولیس په دې توانېدلي چې د لوګر ولایت په مرکز پل علم او ولسوالیو کې د نشه يي توکو کرکېله،قاچاق او راکړې ورکړې مخنیوی کړی ده.
نوموړي زیاته کړه، نیول شوي کسان به ډېر ژر د عدلي او قضايي ارګانونو ته وروپېژندل شي.
هېره دي نه وي چې د لوګر ولایت امنیه قوماندانۍ پولیسو ددغه ولایت په خوښۍ ولسوالۍ کې نږدې ۶ سوه کېلو ګرامه چرس نیولي وو.
