د لوګر امنیتي مسوولین وایي چې د دغه ولایت په مرکز پلعلم او محمداغه ولسوالۍ کې څلور جلا ترافیکي پېښې شوې چې له امله یې درېیو تنو ژوند له لاسه ورکړی او ۱۳ نور ټپیان شوي دي.
د لوګر امنیې قوماندانۍ ویاند مولوي احمدالله انس مهال راډیو ته وویل، یادې ترافیکي پېښې د مرکز پلعلم په خضر، التمور، جمعه کلا او محمداغې ولسوالۍ کې د موټرو د ټکر له امله رامنځته شوې دي.
ده زیاته کړه، په یادو ترافیکي پېښو کې درېیو کسانو خپل ژوند له لاسه ورکړی او ۱۳ نور ټپيان شوي دي.
انس زیاته کړه، د یادو پېښو ټپيان د امنیتي ځواکونو او ولسي وګړو له لوري ولایتي روغتون ته لېږدول شوي چې له ډلې یې د اوو کسانو روغتیايي حالت نازک ښودل شوی دی.
د امنیې قوماندانۍ ویاند د رامنځته شوو ترافیکي پېښو اصلي لامل د موټرچلوونکو ګړندی تګ او بېاحتیاطۍ بولي.
