د اسراییل د لومړي وزیر دفتر ویلي چې د جمعې له ورځې راهیسې تر نن سهار پورې نښتو کې ۲۴ اسراییلیان وژل شوي او ۵۹۲ نور ټپیان دي.
سيانان شبکې نن (دوشنبه، جوزا ۲۶) راپور ورکړی چې د ۱۰ ټپیانو وضعیت هم نازک دی.
د اسراییل د لومړي وزیر د بیانیې پر اساس، ایران د نښتو پرمهال په اسراییل څه باندې ۳۷۰ بالستیک توغندي او سلګونه ډرون توغولي دي.
ایران د تېرې جمعې په ورځ د دغه هېواد پر ځینو برخو او پوځي چارواکو د بریدونو په غبرګون کې اسراییل په نښه کړی دی.
د دواړو لورو ترمنځ بریدونه داسې مهال دوام لري چې د جګړې پراخېدو څخه اندېښنې مخ په زیاتېدو دي.
اسراییل او ایران دواړو تراوسه د شاتګ یا بېړني اوربند لپاره چمتوالی نه دی ښوولی.
رویټرز اژانس نن د ایراني چارواکو په خبره ویلي، تر هغه چې د اسراییل بریدونه دوام ولري، تهران به خبرو ته چمتو نهشي.
