د لوګر ولایت سیمهییز چارواکي وایي، چې د روان ۱۴۰۴ کال له پیل څخه تر اوسه د اسلامي امارت د مشرتابه د ۱۷مې ګڼې فرمان او یو شمېر نورو فرمانونو د تطبیق او عامه پوهاوي په موخه د بېلابېلو ادارو لهخوا نږدې سل غونډې او پروګرامونه ترسره شوي دي.
د مسؤلینو په خبره، دغه غونډې د لوګر امنیې قوماندانۍ، د سرحدونو، قومونو او قبایلو ریاست، ښاروالۍ، اطلاعاتو او کلتور، پوهنې، حج او اوقافو او یو شمېر نورو ملکي او امنیتي ادارو لهخوا جوړې شوې دي. د دغو پروګرامونو بنسټیز هدف د امیرالمومنین د بېلابېلو فرمانونو په ځانګړي ډول د ناوړه رواجونو د مخنیوي (۱۷مه ګڼه فرمان) تطبیق، عامه پوهاوی او د زیانمنو دودونو له منځه وړل دي.
د لوګر امنیې قوماندانۍ ویاند، مولوي احمدالله انس سلام وطندار راډيو ته وویل، چې د روان کال له پیله تر اوسه د دعوت او ارشاد او ولسي پولیسو مدیریتونو لهخوا په مرکز او ولسوالیو کې شاوخوا ۸۰لویې او وړې غونډې جوړې شوې دي. نوموړي زیاته کړه، په دغو ناستو کې د فرمانونو د محتوا، اړتیا او تطبیقي لارو چارو په اړه خلکو او امنیتي منسوبینو ته هر اړخیز معلومات ورکړل شوي دي.
مولوي انس همدارنګه وویل، دغه غونډې د خلکو له پراخ هرکلي سره مخ شوې او د ولایت اوسېدونکو د فرمانونو د تطبیق په برخه کې هر ډول همکارۍ ته بشپړ چمتوالی ښودلی دی.
بلخوا، د سرحدونو، قومونو او قبایلو چارو ریاست سرپرست، مولوي عبدالباسط امیري سلام وطندار راډیو ته وویل، چې یاد ریاست په محمدآغه، چرخ او برکيبرک ولسوالیو کې د ۱۷مې او ۱۳مې ګڼې فرمانونو د تطبیق او عامه پوهاوي لپاره درې سترې ولسي غونډې جوړې کړي دي. د نوموړي په وینا، خلکو ته د دغو فرمانونو ټول اړخیز معلومات او موخې په تفصیل سره بیان شوي دي.
همدارنګه، د لوګر د اطلاعاتو او کلتور ریاست د اطلاعاتو آمر، حمیدالله صدیقي وايي چې د دغه ریاست لهخوا د امیرالمومنین حفظهالله د فرمانونو په تړاو مشاعرې، د رسنیو له لارې عامه پوهاوي خپرونې، او د فرهنګیانو، مسؤلینو او ځوانانو لپاره د ناوړه رواجونو، انساني قاچاق او نورو مهمو مسایلو په اړه پوهاوي ناستې جوړې شوي دي.
د مسؤلینو په وینا، د یادو ناستو او پروګرامونو له پیل وروسته د ولایت اوسېدونکو هم د ناوړه رواجونو د له منځه وړلو او د فرمانونو د تطبیق په برخه کې پراخې هڅې پیل کړې چې تر ډېره یې مثبتې پایلې لرلې دي.
