لوګر کې د عاشورا مراسمو لمانځلو لپاره ځانګړي امنیتي تدابیر نیول شوي
د لوګر ولایت سیمهییز چارواکي وایي، د عاشورا مراسمو د خوندي ترسره کېدو په موخه د ولایت په مرکز پل علم او ټولو اړوندو سیمو کې ځانګړي امنیتي تدابیر نیول شوي دي.
په همدې موخه د لوګر مرستیال والي مولوي انعامالله «صلاحالدین» په مشرۍ د امنیتي، دفاعي او استخباراتي ادارو د همغږۍ غونډه ترسره شوه، چې پکې د عاشورا مراسمو د امنیتي چمتووالي او لازمې همغږۍ په اړه خبرې وشوې.
په غونډه کې د اهل تشیع هېوادوالو یوه استازي د سیمهییزې ادارې او امنیتي بنسټونو له همکاریو مننه وکړه او د عاشورا ورځې د مراسمو د لا ښه تنظیم او د عزادارانو د امنیت د ټینګښت په اړه یې خپل وړاندیزونه شریک کړل. نوموړي د ولایتي ادارې د لا ډېرو همکاریو غوښتنه هم وکړه.
د لوګر مرستیال والي مولوي انعامالله «صلاحالدین» د خپلو خبرو پر مهال د بېلابېلو قومونو او ټولنیزو قشرونو ترمنځ پر یووالي، ورورولۍ او متقابل درناوي ټینګار وکړ او ویې ویل: «اسلام د اخوت او ورورولۍ دین دی، ټول مسلمانان باید د اسلامي ارزښتونو د ساتنې او د اسلام د دښمنانو پر وړاندې په ګډه مبارزه وکړي.»
هغه له اهل تشیع هېوادوالو وغوښتل چې د محرم په ورځو کې له امنیتي ځواکونو سره نږدې همکاري وکړي، مشکوکو کسانو ته د جوماتونو، حسینیو او تکیهخانو د نږدې کېدو اجازه ورنه کړي او د هر ډول شکمن فعالیت په اړه اړوندو ادارو ته خبر ورکړي.
په ورته وخت کې امنیتي، دفاعي او استخباراتي مسئولینو ګډونوالو ته ډاډ ورکړ چې د عاشورا مراسمو د امنیت د ټینګښت لپاره ټول لازم تدابیر نیول شوي او امنیتي ځواکونه په بشپړ چمتووالي سره د خلکو د امنیت د خوندي ساتلو لپاره هڅې کوي.
د غونډې په پای کې له خلکو وغوښتل شول چې له امنیتي ادارو سره همغږي وساتي او د هر ډول مشکوک فعالیت یا پېښې په صورت کې ژر تر ژره اړوندو امنیتي ارګانونو ته خبر ورکړي.
