د لوګر ولایت د پوهنې ریاست مسؤلین وایي، چې د دغه ولایت په مرکز او ولسوالیو کې د ښوونکو د کمښت ستونزې د هواري په موخه ۳۵۸ تنه نارینه او ښځینه قراردادي ښوونکي وګمارل شول.
د لوګر د پوهنې ریاست ویاند شاپور عرب مهال راډيو ته وویل، چې یاد ښوونکي د دغه ریاست د هڅو په پایله کې د پوهنې وزارت له لوري منظور شوي او له یوې رڼې او رقابتي پروسې وروسته د تدریس لپاره ګومارل شوي دي.
د عرب په خبره، په ګومارل شویو ښوونکو کې ۲۸۲ نارینه او ۷۶ ښځینه ښوونکې شاملې دي، چې د دوی په ګومارنې سره په یو شمېر ښوونځیو کې د ښوونکو د کمښت ستونزه تر ډېره هواره شوې ده.
د لوګر د پوهنې ریاست د معلوماتو له مخې، اوس مهال په دغه ولایت کې ۲۸۹ دولتي ښوونځي فعالیت کوي، چې شاوخوا ۱۶۲ زره زدهکوونکي په کې پر زدهکړو بوخت دي.
